لاہور: زندہ دلانِ لاہور کے لیے بڑی خوشخبری، پنجاب حکومت نے صدیوں پرانے ثقافتی تہوار بسنت کو رواں صدی میں پہلی بار سرکاری سطح پر منانے کا اعلان کر دیا ہے۔ ڈپٹی کمشنر لاہور سید موسیٰ رضا نے اس حوالے سے باضابطہ نوٹیفکیشن جاری کرتے ہوئے ضابطہ اخلاق (SOPs) بھی واضح کر دیے ہیں۔
تین روزہ جشن اور تاریخیں: نوٹیفکیشن کے مطابق، ضلع لاہور کی حدود میں بسنت کا میلہ 6 سے 8 فروری 2026 تک تین روز جاری رہے گا۔ حکومت نے طویل عرصے بعد پتنگ بازی کی مشروط اجازت دی ہے، تاہم اس کے لیے سخت حفاظتی اقدامات کو لازمی قرار دیا گیا ہے۔
سخت شرائط اور رجسٹریشن: پتنگ اور ڈور بنانے والوں (مینوفیکچررز) کی رجسٹریشن کے لیے ‘ای بز ایپ’ اور آن لائن پورٹل فعال کر دیا گیا ہے۔ کاروباری حضرات 30 دسمبر سے رجسٹریشن کا عمل شروع کر سکتے ہیں، جبکہ پتنگ بازی کا سامان صرف یکم سے 8 فروری تک فروخت کرنے کی اجازت ہوگی۔
حفاظتی اقدامات اور پابندیاں: انسانی جانوں کے تحفظ کے لیے انتظامیہ نے درج ذیل سخت قوانین وضع کیے ہیں
موٹر سائیکل سواروں کی حفاظت: بسنت سے قبل تمام موٹر سائیکل سواروں کے لیے بائیک پر حفاظتی تار (Safety Wire) لگوانا لازمی قرار دیا گیا ہے۔
ڈور کی قسم: نائلون، پلاسٹک، دھاتی تار اور کیمیکل کوٹنگ والی “خونی ڈور” پر مکمل پابندی ہوگی۔ ڈور صرف “پنا” کی شکل میں فروخت کی جا سکے گی۔
چرخیوں پر پابندی: ڈور کے لیے روایتی چرخیاں بنانے اور بیچنے پر مکمل پابندی عائد ہوگ
سائز کی حد: پتنگ اور گڈے کا سائز مقررہ حد سے بڑا ہونے پر قانونی کارروائی کی جائے گی۔
انتظامیہ کا عزم: ڈپٹی کمشنر سید موسیٰ رضا کا کہنا ہے کہ بسنت لاہور کا ثقافتی ورثہ ہے، لیکن انسانی جانوں کا تحفظ ہماری اولین ترجیح ہے۔ ممنوعہ ڈور بیچنے والوں کے خلاف ‘زیرو ٹالرنس’ پالیسی اپنائی جائے گی اور پولیس کو سخت کریک ڈاؤن کی ہدایت کر دی گئی ہے۔ انہوں نے والدین سے بھی اپیل کی ہے کہ وہ اپنے بچوں کو غیر قانونی ڈور کے استعمال سے روکیں۔