یورپ میں اعلیٰ تعلیم حاصل کرنے اور تحقیق کرنے کے خواہشمند پاکستانی طلبہ کے لیے ایک زبردست موقع دستیاب ہے۔ یورپی کمیشن کے “ہورائزن یورپ پروگرام” کے تحت شروع کی گئی “میری اسکلوڈوسکا کیوری ایکشنز (MSCA) ڈاکٹرل نیٹ ورکس 2025” اسکیم مکمل فنڈڈ پی ایچ ڈی اسکالرشپس فراہم کرتی ہے۔ اس پروگرام کا مقصد نوجوان محققین کو عالمی سطح پر تسلیم شدہ ماہر بننے کے لیے تربیت فراہم کرنا ہے۔
پروگرام کا مقصد
MSCA ڈاکٹرل نیٹ ورکس کا بنیادی مقصد بین الاقوامی تعاون، سائنسی تحقیق اور عملی تجربے کے ذریعے نئی نسل کے محققین کو تیار کرنا ہے۔ اس منصوبے کے تحت طلبہ کو مختلف تعلیمی اور صنعتی ماہرین کے ساتھ کام کرنے کا موقع ملتا ہے، جس سے وہ اپنے کیریئر کے لیے ضروری مہارتیں حاصل کرتے ہیں۔
پروگرام کی اقسام
یہ اسکالرشپ تین اقسام کے پی ایچ ڈی پروگرامز پر مشتمل ہے:
اسٹینڈرڈ ڈاکٹرل نیٹ ورکس: روایتی ریسرچ بیسڈ پی ایچ ڈی پروگرامز جو مختلف یورپی جامعات میں منعقد ہوتے ہیں۔
انڈسٹریل ڈاکٹرٹس: یونیورسٹی اور صنعت کے ماہرین کی مشترکہ نگرانی میں عملی و تحقیقی تربیت۔
جوائنٹ ڈاکٹرٹس: مختلف یورپی جامعات کے اشتراک سے مشترکہ یا ڈوئل ڈگری پروگرام۔
اسکالرشپ میں شامل سہولیات
یہ پروگرام مکمل طور پر یورپی یونین کے فنڈز سے سپورٹ کیا جاتا ہے، جس کے باعث طلبہ کو مالی پریشانی کے بغیر تحقیق اور تعلیم پر توجہ مرکوز کرنے کا موقع ملتا ہے۔ اسکالرشپ میں درج ذیل مراعات شامل ہیں:
ماہانہ وظیفہ
منتقلی (Relocation) کے لیے خصوصی الاؤنس
فیملی اور خصوصی ضروریات کے لیے اضافی الاؤنس (اگر لاگو ہو)
تحقیق، تربیت اور نیٹ ورکنگ کے اخراجات
مکمل مینجمنٹ اور آپریشنل اخراجات کی ادائیگی
پی ایچ ڈی پروگرامز کی مدت تین سے چار سال پر مشتمل ہوتی ہے، جن میں طلبہ کو بین الاقوامی ماحول م اعلیٰ معیار کی تعلیم فراہم کی جاتی ہے
اہلیت کے معیار
یہ اسکالرشپ دنیا بھر کے طلبہ کے لیے کھلی ہے، بشمول پاکستانی امیدواروں کے۔ درخواست دہندگان کے لیے شرائط درج ذیل ہیں:
متعلقہ شعبے میں ماسٹر ڈگری کا حامل ہونا
پی ایچ ڈی کی ڈگری پہلے سے نہ رکھی ہو
“Mobility Rule” کے مطابق پچھلے تین سالوں میں میزبان ملک میں 12 ماہ سے زیادہ قیام نہ کیا ہو
درخواست دینے کا طریقہ
دلچسپی رکھنے والے طلبہ EURAXESS پورٹل پر جا کر دستیاب MSCA پی ایچ ڈی پوزیشنز دیکھ سکتے ہیں۔ درخواستیں براہِ راست متعلقہ یونیورسٹی یا ادارے کو جمع کرائی جاتی ہیں۔ ہر اشتہار میں تحقیق کے شعبے، اہلیت اور آخری تاریخ کی تفصیلات فراہم کی جاتی ہیں۔
پاکستانی طلبہ کے لیے اس پروگرام کی اہمیت
MSCA اسکالرشپ صرف تعلیمی ترقی کا موقع نہیں بلکہ ایک بین الاقوامی تجربہ بھی ہے۔ اس پروگرام کے تحت طلبہ کو:
یورپ کے معروف ریسرچ سینٹرز میں عملی تجربہ حاصل کرنے کا موقع
صنعت اور اکیڈمیا کے اشتراک سے سیکھنے کا منفرد ماحول
عالمی سطح پر تسلیم شدہ ڈگری اور مضبوط کیریئر امکانات
تخلیقی صلاحیت، اختراع اور عالمی اثر کے حامل منصوبوں کا حصہ بننے کا موقع
درخواست کی آخری تاریخ
MSCA Doctoral Networks 2025 کے لیے درخواستیں اس وقت کھلی ہیں، اور آخری تاریخ 25 نومبر 2025 مقرر کی گئی ہے۔